Irmáns (Celso Emilio Ferreiro)
IRMÁNS __ Celso Emilio Ferreiro
(“Longa noite de pedra”, 1962)
Camiñan ó meu rente moitos homes.
Non os coñezo. Sonme estraños.
Pero ti, que te alcontras alá lonxe,
máis alá dos desertos e dos lagos,
máis alá das sabanas e das illas,
coma un irmau che falo.
Se é tua a miña noite,
se choran os meus ollos o teu pranto,
se os nosos berros son iguais,
coma un irmáu che falo.
Anque as nosas palabras sexan distintas,
e tí negro e eu branco,
se temos semellantes as feridas,
coma un irmáu che falo.
Por enriba de tódalas fronteiras,
por enriba de muros e valados,
se os nosos soños son iguais,
coma un irmáu che falo.
Común témos a patria,
común a loita, ambos,
a miña man che dou,
coma un irmáu che falo.
www.galespa.com.ar/FERREIRO_irmans.htm
Resultados electorais: análise
10 MARZAL
10 de marzo. Que data é esta, compañeiros? Si, é a xornada postelectoral mais… debera ser o inicio da campaña electoral en Galiza.
“209.042 razóns para que Galiza sexa decisiva”. Tan só 315 razóns máis que hai catro anos. E a iso chamádeslle vitoria? Certo é que o Bng salvouse desta racha de bipartidismo, pero, quen nos di que á seguinte non cae? Conformarse coa estabilidade é abrirlle as portas a unha involución, a un retroceso. Un dato: nestas eleccións ao congreso obtivemos 100.000 votos menos que no 2000, un avance enorme…
Que sucedía a finais dos 90 para que o BNG lograse o mellor resultado electoras da súa historia e se convertera na segunda forza política de Galiza? Que ocorreu naqueles anos para que o BNG conseguira preto de 400.000 votos nas eleccións ao Parlamento galego de 1997?
Compañeiros, busquemos pois, a esencia do BNG de hai dez anos. Non nos acomodemos na actuación institucional. A vitoria lograrémola actuando dende as bases. Mobilizando á militancia de cada un dos 315 municipios de Galiza para que labren en cadanseu concello a semente do nacionalismo galego. Fagamos de Galiza Nova, da UMG as grandes organizacións da mocidade galega. Que estean presentes en todos os institutos. Que non haxa un so centro de educación secundaria ao que non cheguen eses referentes para os moz@s
Volvamos os ollos á Xeración Nós, a eses artífices do Segundo Rexurdimento da Cultura galega. Estendamos, coma eles, en xornais e revistas feitos en cada concello e para cada concello as marabillas do ser galegos, o orgullo de sermos unha nación, a miseria e os problemas que nos envolven e as solucións que propoñemos. Démoslle a pluma á nosa militancia para que acheguen os seus pensamentos, as súas conviccións, para que compartan os problemas e propoñan solucións e fagan un pouco máis galegos a todos os seus veciños.
Dese xeito, irmáns, farémoslle un ben inestimábel a Galiza, ao nacionalismo e, sen dúbida ningunha, ao BNG e aos galegos e galegas.
Non perdamos un so segundo. Os tempos son chegados dos bardos das idades e somos nos os que temos de espertar do seu sono ao fogar de Breogán. Que os nosos berros o esperten axiña non vaia ser que non esperte máis.